आदिमाया आदिशक्ती
आदिमाया आदिशक्ती तुच जननी साऱ्यांची
तुझ्या दारी घेऊन आलो एक वारी भक्तीची |धृ|
नवदुर्गा गायत्री अंम्बा तु चामुंडा इंद्राणी
फरसाधारणी काली तु शीतला नारायणी
उमा जगदंबा आई भवानी त्रिपुरासुंदरी
कात्यायनी लक्ष्मी असो कृपा आम्हावरी
जागर करु नवरात्रीचा इच्छा सगळ्यांची |१|
आदिमाया आदिशक्ती तुच जननी साऱ्यांची
नऊ रुपे नित्य नवी तुझीच गे माऊली
सदा राहूदे आम्हांवरी कृपेची सावली
शक्तीपीठे साडेतीन जागृत तुझी आई
झुकवितो मी श्रद्धेने माथा तुझेच पायी
कृपादृष्टी राहो मजवरी प्रार्थना ही भक्ताची |२|
आदिमाया आदिशक्ती तुच जननी साऱ्यांची
दैत्य संहारक महामाया भक्ताना पावक
तन मन धनाने होऊ पाही तुझाच सेवक
ॐकारणी एकरूपी वैष्णवी तु ग वराही
ठेव माथी भक्ता वरदहस्त कृपाळू पाही
ऐकावी माते हाक आर्त आम्हा सर्व भक्तांची |३|
आदिमाया आदिशक्ती तुच जननी साऱ्यांची
https://marathikavita.co.in/marathi-song-lyrics/t38686/msg80143/#msg80143
©शिवाजी सांगळे 🦋papillon
संपर्क: +९१ ९५४५९७६५८९
