निरागस

निरागस

उन्हाळ्याची सुट्टी कुठे सर्वांच्या नशिबी 

बाहेर 'कडक' उन,गर्दी अशीबी तशीबी

हरवलेली सावली वाऱ्याचा पत्ता नाही 

आग ओकतो सुर्य अंगाची लाही लाही 

आपणच रे कारण बेसुमार वृक्ष तोडतो 

मग,निसर्ग काय तुम्हास सहज सोडतो 

अवकाळी,कधी कोरडा,ओला दुष्काळ

तो निरागस,आपणच घेतो त्यावर आळ

घालवायची जर मस्त उन्हाळ्याची सुट्टी

तर जप निसर्ग न् कर त्या सोबत दोस्ती

https://marathikavita.co.in/index.php?topic=80770.new#new

©शिवाजी सांगळे 🦋 papillon

संपर्क: +९१ ९५४५९७६५८९

स्व-सन्मान

स्व-सन्मान

आज करतोय कामगार दिन साजरा

प्रत्यक्षात आहे कामगार दीन बिचारा,

अतिशयोक्तीपुर्ण काही नाही सांगत

खात्री करण्या आमगारानांच विचारा !

व्यवसाय सारे, मंदावल्यात नोकऱ्या 

त्यातच सर्वत्र बेरोजगारी फोफावली,

तुटपुंज्या, सकल व्यवस्थेची इथल्या 

हि प्रातिनिधीक कैफियत हो मांडली !

आधार कष्टकरी, कामकरी, शेतकरी 

तारणहार अवघ्या साऱ्या या जगाचा,

थोडा तरी दृष्टिकोन बदलायला हवा 

त्यांनाही आहे हक्क, स्व-सन्मानाचा !

https://marathikavita.co.in/index.php?topic=80301.new#new

©शिवाजी सांगळे 🦋 papillon

संपर्क: +९१ ९५४५९७६५८९

सांधणे ११०४२०२६ yq १७:४८:१०

सांधणे

भिंतीच्या भेगा बुजवता येतील

मनावरच्या ओरखड्यांच काय?

वर वर मलमपट्टी होऊन जाईल

आतला घाव मिटून जातो काय?

ठरवून नाही होत, काही चुका,

चुकूनच दु:खाला कारण होतात

विसरून जावू म्हणता म्हणता

तेवढ्या खोलवर रुतून बसतात!

चालायचंच, म्हणून सोडून देता

फिरून नव्याने गाठी बांधायच्या

पडक्या घरात राहतं का कोणी?

पडलेल्या भेगा हळू सांधायच्या!

©शिवाजी सांगळे 🦋 papillon

संपर्क: +९१ ९५४५९७६५८९

ऋण-ओव्या

ऋण-ओव्या

आपोआप सुचते गं, जात्यावरी ओवी 

किती सांगू गं आता, मराठीची थोरवी...१

ज्ञानोबाने सोपी केली,देवाची गं गीता

अशी गोड भाषा, सारे वाचतोय आता...२

झाले कैक अत्याचार मिटवण्या तिला

तरीही तगली माय,सोसून अन्यायाला...३

संतांनी जोपासली, अभंगाच्या रुपाने

गायल्या कुणी ओव्या,कुणी भारुडाने...४

वारसा हा थोर, दिला जो आपल्याला

झेंडा या मराठीचा, भिडवूया गगनाला...५

बाळपणी वाढलो, बोलूनी बोल जिचे

करु प्रयत्न जरासे,फेडण्या ऋण तिचे...६

https://marathikavita.co.in/index.php?topic=76659.new#new

©शिवाजी सांगळे 🦋 papillon

संपर्क: +९१ ९५४५९७६५८९

मराठी

मराठी

प्रांतवार बदलते माय मराठी 

तरी सर्वां सोपी, माय मराठी ! 

येतो जो जो येथे, टेकतो येथे

प्रत्येकास त्या पोसते मराठी !

वंदितो कधी चुकून कुणीतरी 

कधी अपमान सोसते मराठी ! 

गौरविली, अभिजात म्हणूनी 

मुळी श्रेष्ठ होती, आहे मराठी !

जन्मलो मातीत या थोर भाग्य 

बोलती सारे जिथे माय मराठी !

https://marathikavita.co.in/index.php?topic=76658.new#new

©शिवाजी सांगळे 🦋 papillon

संपर्क: +९१ ९५४५९७६५८९

किल्ली ०६०२२०२६ yq २०:०३:५३

किल्ली 

बघ खात्री पटेल तुला एकदा

शाश्वत या साऱ्या सृष्टीची 

एक एक बीज रुजते

येथे थोर कष्टाने

सावध हो, मानवा

वेळीच अजून

अती उन्माद तुला 

दावेल किंमत जगण्याची 

श्वासागणिक जळते माती

अहोरात्र ध्यास धरून

ठेव भान जरा त्या कष्टाचे

करतोस चिंता सदैव स्वतःची

प्रयत्न कर जरासे

सापडेल किल्ली समाधानाची!

©शिवाजी सांगळे 🦋 papillon

संपर्क: +९१ ९५४५९७६५८९

वळणांवर

वळणांवर

जीवनाच्या प्रत्येक वळणांवर

घडणारच काही तरी हमखास 

असो वा नसो, मनात कोणता

हवा नकोसा भलाबुरा हव्यास 

वाटेवरती वळण,पाण्यात लाट 

प्रवृत्त करते, घेण्यास आदमास 

सावरता वेळ, तेवढी सारासार

खात्रीने सुखरूप होईल प्रवास

https://marathikavita.co.in/index.php?topic=75283.new#new

©शिवाजी सांगळे 🦋 papillon

संपर्क: +९१ ९५४५९७६५८९

मनोगत १००१२०२६ yq १३:३८:१२

मनोगत

नकोय गंभीर चेहरा,नको वैचारीकतेचा आव

लिही मनापासून,मनी उमटलेला सच्चा भाव

नाही जमला जरी आकृतिबंध, नियम न् छंद

तरी नक्की घे, तुझ्या शब्दात भोवतीचा ठाव

युगानुयुगे विरोधच होतोय इकडे नाविण्याला

लखलाभ त्यां करती जे मारुनी मिशीला ताव

  

घेतील जाणकार समजून एकएक शब्द तुझा

लक्ष नको त्यांकडे, करती जे उगा काव काव

©शिवाजी सांगळे 🦋 papillon

संपर्क: +९१ ९५४५९७६५८९

प्रशस्त मार्ग

प्रशस्त मार्ग

कोवळे सारे हे बांध भावनांचे 

करतात दृढ रे नाते परस्परांचे 

अंतरी कसलाच स्वार्थ नसतो 

जोपासताना भान सहकार्याचे

अस्तित्व हे मोजक्या श्वासांचे 

तुमचे,माझे न् आपणां सर्वांचे

वास्तव्य इथले..क्षणा क्षणांचे 

सुकर असावे,स्वप्न जगण्याचे 

सृष्टी नियमच हा सरळ साधा

असूदे प्रशस्त..मार्ग जीवनाचे 

https://marathikavita.co.in/index.php?topic=71720.new#new

©शिवाजी सांगळे 🦋 papillon

संपर्क: +९१ ९५४५९७६५८९

पुरक २०११२०२५ yq १६:३४:०८

पुरक

होडीने नेहमी वाट पाहावी किनाऱ्याची

किनाऱ्याने पण प्रतिक्षा करावी होडीची 

समजून, अविभाज्यपण ते परस्परांतले

दोघांनी पण इभ्रत राखावी एकमेकाची 

त्रयस्थ असूनही खरी गरज लाट येथली 

अपरिहार्यता, स्विकारून घ्यावी लाटेची

म्हणो तरबेज आहे खुप कुणी स्वतःला 

चालत नसतेच, तरीही अरेरावी एकाची

म्हणताना आहो पुरक परस्परां आपण 

तेंव्हाच चालेल, नौका भावी जीवनाची 

©शिवाजी सांगळे 🦋 papillon

संपर्क: +९१ ९५४५९७६५८९

कलाकार २६१०२०२५ yq १७:१०:२५

कलाकार

तोवर हे असेच चालू राहणार...

जोवर, तिसरी घंटा वाजणार...

रंगमंचावरील ध्वनी प्रकाशात

कलाकार स्वतःला विसरणार...

चेहऱ्यावर, रंग लावल्यानंतर 

खुशाल स्वतःस झोकून देणार...

चाखतांना अभिनयाची गोडी

प्रेक्षकांना देखील तृप्त करणार...

©शिवाजी सांगळे 🦋 papillon

संपर्क: +९१ ९५४५९७६५८९

कारण

कारण  

आनंदी व्हायला कारण कुठे लागते!
नाराज व्हायला कारण कुठे लागते!

झुळूक वाऱ्याची हळू स्पर्शून जाता 
कुणाला त्रासदायक का कुठे वाटते!

माझे तुझे अन् तुझे माझे, करतांना 
सौख्य खरे,अंतर्मनाला कुठे भासते?

अनिश्चित जीवन अल्पकाळ येथले
जाणण्या रात्रंदिन कुठे कुठे जागते!

म्हणा,गेला तो सुखाने, क्षण आला 
कवटाळून व्यथा,सुख कुठे लाभते!

https://marathikavita.co.in/index.php?topic=65304.new#new

©शिवाजी सांगळे 🦋papillon
संपर्क: +९१ ९५४५९७६५८९

ध्येय

ध्येय

तु एक मीही एक दोघं प्रवासी एका वाटेचे
माहीत नाही कुणाला गंतव्य कुठे कोणाचे

वाट सारी चाळलेली, तरी थोडी मळलेली
असून समांतर,तरी अंतर राहील कायमचे

लागलीच का थांबतो प्रवास खेळ इथला? 
हुशारीने दरवेळी आपले पाऊल टाकायचे

स्पर्धेच्या युगात नित्य रे अडथळे नियमांचे
पाळून अटी,शर्ती सर्व नेमके उत्तर द्यायचे

डाव प्रतीडाव खेळू दे, भले कुणी कितीही
तत्त्व प्रामाणिकतेचे, स्वतः नाही सोडायचे

म्हणो कुणी आहे कठीण वाटचाल इथली
लढून हिमतीने, तु ध्येय मनातले गाठायचे

https://marathikavita.co.in/index.php?topic=57119.new#new
©शिवाजी सांगळे 🦋papillon
संपर्क: +९१ ९५४५९७६५८९ 

प्रयत्न तर कर

प्रयत्न तर कर

एकदा प्रयत्न तर कर...बघ चार शब्द मांडून 
मोकळं होईल मन तुझं बघ चार शब्द सांगून

कोंडलेल्या भावनांनी खरं त्रास होतो मनाला
चर्चा कर कुणाशी तरी, बघ चार शब्द बोलून

पानगळ होते शरदऋतूत पाहतो आपण सारे
आठव ऋतू तो बोलता,बघ चार शब्द टाळून

होताच कधी अपमान अवहेलना विनाकारण
खुशाल द्यावेत तोंडावर बघ चार शब्द मारून

करूनही चूक कुणी मागता प्रामाणिक माफी
क्षमा करताना बोलावेत बघ चार शब्द हासून

https://marathikavita.co.in/index.php?topic=54170.new#new

©शिवाजी सांगळे 🦋papillon
संपर्क: +९१ ९५४५९७६५८९