तुज आठवांचे
क्षणात स्फुरते क्षणात स्मरते
तुज आठवांचे मग गाणे होते
मनी घोळता उमाळे तुज स्मृतींचे
ओसंडूनी येती भाव मज मनीचे
विस्मरावे कसे कळेना गुज प्रेमाचे
वेळी अवेळी मन उगा बावरते
हलकेच हळूवार नेत्र पाणवते...१
तुज आठवांचे...
आयुष्याचे सगळे हिशोब फसले
रस्तेच आपले जेव्हा विलग झाले
सारेच अवघड आता जगणे आले
सावरावे तोवर मन पुन्हा गुंतते
सांग तुलाही का हे कोडे पडते...२
तुज आठवांचे...
दिल्या घेतल्या त्या सऱ्या वचनांचे
रेखाटले चित्र मी भेटल्या स्थळांचे
मलाच उरे ना त्यात भान स्वतःचे
भावनांचे कुठवर हे खोडावे नाते
उचंबळून येता मन चिंबचिंब होते...३
तुज आठवांचे...
https://marathikavita.co.in/marathi-song-lyrics/t33499/new/#new
©शिवाजी सांगळे 🦋papillon
संपर्क: +९१ ९५४५९७६५८९
