फायद्यात यावे

फायद्यात यावे 

पाहिलेले एक स्वप्न केंव्हातरी सत्यात यावे 

शब्द भारदस्त चांगले माझ्या भात्यात यावे

लिहितोय हो, आजवर मी रोज काहीबाही 

गुपचूप कोणते तरी अनुदान खात्यात यावे 

घडताना उगा घटना विचित्र काही भोवती  

वाटेल का कधी कुणा फुकट गोत्यात यावे 

अशीच चालते,जगरहाटी आजकाल भावा 

नाही कुणी आप्त कुणाचे,का नात्यात यावे

सोसलाय घाटा बराचसा वावरताना इकडे

वाटते फिरून पुन्हा एकदा फायद्यात यावे 

https://marathikavita.co.in/index.php?topic=70081.new#new

©शिवाजी सांगळे 🦋 papillon

संपर्क: +९१ ९५४५९७६५८९

सुराज्याची हाळी १९१०२०२५ yq १६:४९:५२

सुराज्याची हाळी

व्हावी दिन दिन दिवाळी रोज रोज 

अन् सुखांची मांदियाळी रोज रोज

बरसात आनंदाची होऊदे सर्वोपरि

अन् भय दु:खाची,होळी रोज रोज

एकएक फटाका वाजत उंच जाता 

तमो गगनी, तेज उजळी रोज रोज

मिष्टान्न,फराळ गोड लाभो सर्वांसी 

नी गरीबा पोटभर थाळी रोज रोज 

अंत नसावा येथे कुणाच्या सुखाला

सुराज्याची गुंजावी हाळी रोज रोज 

©शिवाजी सांगळे 🦋 papillon

संपर्क: +९१ ९५४५९७६५८९

शोधात स्वतःच्या ०११०२०२५ yq १५:२५:०५

शोधात स्वतःच्या

स्वतःच्या शोधात कुठवर आता फिरायचे 

कोण आपले, कोण परके कसे शोधायचे

आहे कुठे वेळ एवढा, सांभाळण्या नाती

खाद्यासाठी दिवसभर फडफडत रहायचे

वाट्याला जे आले, ते समजून मधूर सारे

पंखावरले वर्ख,सह्रदयांस मुक्त वाटायचे

अल्पजीवी नाते, अल्प जीवन आहे तरी

घेत स्वानंद, मनमुराद चौफेर बागडायचे

कोण आपले, कोण परके कसे शोधायचे

स्वतःच्या शोधात कुठवर आता फिरायचे

©शिवाजी सांगळे 🦋papillon

संपर्क: +९१ ९५४५९७६५८९

स्वप्नरंजन २००८२०२५ yq १५:५२:४५

स्वप्नरंजन

डोळ्यात दाटे तुझे स्वप्न आता 
तुच दिसतेस रात्रंदिनी येताजाता 

जादुगरी कसली ही जीवघेणी
सुचेना कामधंदा, तुझी याद येता 

वेडेपणा केवढा माझ्या मनाचा
गडबडतो वास्तवात समोर तू येता 

धीट,अल्लड काय म्हणावे तूला
बोलतेस छान जराही न डगमगता 

हवासा खेळ हा सारा वाटे बरा
स्वप्नरंजन केवढे मनाचे पहा आता 

भास, आभास मात्र हे सगळे
दाटती डोळ्यात तूच स्वप्नात येता 

©शिवाजी सांगळे 🦋papillon
संपर्क: +९१ ९५४५९७६५८९

शाश्वत

शाश्वत

शोध घेता शाश्वताचा दु:खच गवसले मला
सुख हवे पुन्हा,भोगणारे म्हणू लागले मला

तक्रार गोठल्या बर्फास, टोचणाऱ्या सुईची
स्पर्शाने मात्र, गारठ्याचे काटे टोचले मला

कशाला हवी आणखी परीक्षा नवी विषारी
परंपरांनी जुन्या,पुन्हा खिंडीत गाठले मला

सावकाश जा तू इथून, आधीच म्हटले होते
कर्तव्यदक्ष टोळीने,होते चौकात घेरले मला

ठरविले होते टाळूया दु:खांना वारंवार जरी
सुख आगळे, भेटीत त्यांच्याच लाभले मला

नको असतो कुणासही साधा मित्र अताशा  
उगाच का सोबत्यांनी अर्ध्यात सोडले मला

https://marathikavita.co.in/index.php?topic=62363.new#new

©शिवाजी सांगळे 🦋papillon
संपर्क: +९१ ९५४५९७६५८९ 

हसायला येतं ०८०८२०२५ yq १३:४१:१३

हसायला येतं

कसं काय विसरायला होतं हल्ली फार

बातमी अर्धी कुणी का देतं हल्ली फार

काय बरं होतं लिहायचं?आठवत नाय

असं विचित्र काहीतरी होतं हल्ली फार 

लक्षात ठेवतो नक्की सांगा आता जरा 

अचानक असं का बिघडतं हल्ली फार

लक्षात ठेवायचं म्हणून विसरतो सगळं

गम्मत वाटता हसायला येतं हल्ली फार 

छे, भलतंसलतं तसं तर काहीच नसावं 

वाढाया लागल वय! वाटतं हल्ली फार

©शिवाजी सांगळे 🦋papillon

संपर्क: +९१ ९५४५९७६५८९

साक्ष

साक्ष

बस एवढीच काय ती माझी कमाई आखरी
दिले घेतले जे काही त्यास साक्ष हि स्वाक्षरी 

विखुरलेत ठसे अस्पष्ट काही आसमंती येथे
तरी आहेत ठोस काही कोरलेले मना अंतरी 

सोडून कितीक द्यावे, बोलणे कुणा कुणाचे
लागतोच ना शब्द एखादा शेलका जिव्हारी 

जातो जिथे तीथे, वाटते असतो मी, एकटा
एखादी तरी असतेच, अज्ञात चिंता शेजारी 

सावल्या आठवणींच्या येता दारी मनाच्या
गुंतवून स्वतःत त्या, करतात वसूल उधारी 

https://marathikavita.co.in/index.php?topic=61550.new#new

©शिवाजी सांगळे 🦋papillon
संपर्क: +९१ ९५४५९७६५८९ 

स्वातंत्र्य बंधनातले

स्वातंत्र्य बंधनातले

जीव गुदमरत आहे रे, अधांतरी 
व्याप खासा, येण्या जमिनीवरी 

कोणते आकाश येथे, जगण्याचे 
तरीही झुलतोच आहे वाऱ्यावरी 

सारेच व्यर्थ, अवडंबर शाश्वताचे 
कोण नाही, अवलंबून कुणावरी

वाटे मोहक, स्वातंत्र्य बंधनातले 
गुदमरतो श्वास बेतता जीवावरी

खेळ अवघा, विचारांचा एकल्या 
तुटते नाळ,कळते येता भानावरी

https://marathikavita.co.in/index.php?topic=61385.new#new

©शिवाजी सांगळे 🦋papillon
संपर्क: +९१ ९५४५९७६५८९

श्रावण आला

श्रावण आला

श्रावण आला श्रावण आला 
पालवी फुलांचा बहर आला
रांगोळी फुले दारी सजताना
व्रतवैकल्यांचा आनंद आला

श्रावण आला श्रावण आला
माहेरवाशिणींचा सण आला
झिम्मा, फुगडी भोंडल्यासंगे
मंगळागौरीचाही खेळ आला

श्रावण आला श्रावण आला
मंदिरी भजनात जोश आला
आसमंती नवरंग हे उधळता
सुख, आनंदाला बहर आला

https://marathikavita.co.in/index.php?topic=60898.new#new

©शिवाजी सांगळे 🦋papillon

संपर्क: +९१ ९५४५९७६५८९

कल्पनेच्या तीरावर

कल्पनेच्या तीरावर

कित्येक स्मृतींचा ठेवा, कल्पनेच्या तीरावर 
तेव्हा मात्र मन नादान भिरभिरते वाऱ्यावर 

गोडी म्हणा, खोडी म्हणा, लागतोच चाळा 
इवला जीव हा मग राहतोय कुठे थाऱ्यावर 

डुबकी दर डुबकी आठवत राहते काहीतरी 
पुन्हा विसरते भान न् ताबा कसला मनावर

सगळे खोडकर पाणी ढग मन आणि वारा
आरोप प्रत्यारोप, कुणी, करायचा कुणावर 

विसरतो स्वतःला, डोकावता हळूहळू येथे
विरघळताना प्रतिबिंब हे पारदर्शी जळावर 

https://marathikavita.co.in/index.php?topic=60665.new#new

©शिवाजी सांगळे 🦋papillon
संपर्क: +९१ ९५४५९७६५८९

अमृत २६०५२०२५ yq २१:०३:०५

अमृत

घेता दोन घोट जरासे, मेंदूला तजेला देतो
गंधाळून वाफाळल्या धमाल चर्चा घडवतो

थाटामाटात असतो कधी कुठे गुदमरलेला
खरा तर तो, कोपऱ्यावरील टपरीत भेटतो

काळ, वेळ, बंधनं ना त्या कशाचे लागलेले
रोजचा आहे तरी चारचौघात मजा आणतो 

उन्हाळा, पावसाळा वा ऋतू हिवाळा असो
तल्लफ भागवायला हा मात्र तत्पर असतो

ताण तणाव काहीही असो शिण घालवाया
आम्ही चहास या पृथ्वीवरले अमृत म्हणतो

©शिवाजी सांगळे 🦋papillon
संपर्क: +९१ ९५४५९७६५८९

पाऊस फील

पाऊस फील

कोसळला पाऊस येवढा तरी तो फील आला नाही
गढूळ पाण्यात नळाच्या, अजून गारवा मुरला नाही

वेडावतो माणूस जेव्हा, ऋतू त्याची नक्कल करतो
सावरुन जरी घेतो ऋतू, तरी माणूस बदलला नाही

वाहतील नदी नाले, येईलही पूर अताशा कुठे कुठे
तुंबणाऱ्या शहरांना सुद्धा अद्याप तो कळला नाही

कोडकौतुक खरे त्याचे, नित्य शेतात राबणाऱ्यांना
म्हणून मनाजोगा त्यांच्या पाऊस तो बरसला नाही 

बदलू लागलेत आडाखे, सारेच हल्ली असे येथले
कुठे,कधी,किती पडावे?अंदाज हा पावसाला नाही

https://marathikavita.co.in/index.php?topic=56923.new#new

©शिवाजी सांगळे 🦋papillon

संपर्क: +९१ ९५४५९७६५८९

रे मानवा १८०५२०२५ yq २०:४८:०७

रे मानवा 

प्रवास हा नजर रोखून वाटेवरचा 
अहमहमिकेत येथील जगण्याचा 

फसतो दुबळा न् कधी भक्ष्य होतो
अलिखित कठोर नियम निसर्गाचा 

शिस्तबद्ध सारीच यातायात मोठी 
तरीही जो तो अतुट भाग सृष्टीचा 

सारेच शांत आलबेल भूक नसता 
हस्तक्षेप नसतो कुणाला कुणाचा 

तरीही एक विनंती, तुला रे मानवा
सोड उद्योग अतिक्रमण करण्याचा 

©शिवाजी सांगळे 🦋papillon
संपर्क: +९१ ९५४५९७६५८९

साखर झोप

साखर झोप

नाते शब्दांचे जसे सुरांंशी तसे काहीसे माझे तुझ्याशी

होतात खरी, पहाट स्वप्ने, साखर झोप ती हवीहवीशी

वाहता मोगरगंध, मंद त्या कुंतलांचा

भास होता जरासा नाजूक पैंजणांचा

वेडावून देते हालचाल तुझी ती जराशी

मीही शोधतो किणकिण हात उशाशी...१

नाते शब्दांचे जसे सुरांंशी तसे काहीसे माझे तुझ्याशी

चाळवते झोप न् अंगभर उठतो शहारा 

मिठीत बद्ध होण्या तनू दे तनूस दुजोरा

बहरून गारव्यात अन् बिलगता उराशी

चालतो संवाद फक्त स्पर्शाचा स्पर्शाशी...२

नाते शब्दांचे जसे सुरांंशी तसे काहीसे माझे तुझ्याशी

हव्याहव्याशा तृप्तीने होता गात्रे सुस्त

अस्तव्यस्त तरी ही यौवन सुडौल पुष्ट 

वाटता, बोलावे पुन्हा मौनाने मौनाशी

लटका नकार न् डोळ्यात दिसते खुशी...३

नाते शब्दांचे जसे सुरांंशी तसे काहीसे माझे तुझ्याशी

होतात खरी, पहाट स्वप्ने, साखर झोप ती हवीहवीशी

https://marathikavita.co.in/index.php?topic=55761.new#new

©शिवाजी सांगळे 🦋papillon

संपर्क: +९१ ९५४५९७६५८९

भाबडेपणा ०१०५२०२५ yq १६:२५:१०

भाबडेपणा

नाही ठाऊक फुलपाखराला

डायरीमधील फुल सुकले आहे!

कोरडलेल्या पाकळ्यांना पण

भावशून्य शब्दांची साथ आहे!

तरीही भाबडेपणा वेडा इतका

फुलपाखरू घिरट्या घेत आहे!

कुठवर जगावे आशेवर इतके

रंगीत गोजिरा छळभास आहे!

यावी ना,कल्पना या जीवाला

मोहात फसणे असे व्यर्थ आहे!

©शिवाजी सांगळे 🦋papillon

संपर्क: +९१ ९५४५९७६५८९

अज्ञात शक्ती

अज्ञात शक्ती

उच्चारलास कधी शेवटचा शब्द स्मरतो का 
मुक,अबोल संवाद ध्यानी कोणा राहतो का

चालणार कुठवर, प्रित ही राखून मौन असे
राग रूसवा एवढा, मनात कोणी ठेवतो का

कटाक्ष स्पर्श आधी, नंतर संवाद घडला येथे 
वैश्विक संपर्क आधार हा सहजी तोडतो का

होतो आघात शब्दांनी,कबूल, तरीही प्रेमात
दिल्या घेतलेल्या शब्दांचे महत्व टाळतो का

शब्दच देती धीर,आधार हिम्मत आपल्याला
प्रसंगी तीच असते अज्ञात शक्ती जाणतो का 

https://marathikavita.co.in/index.php?topic=54645.new#new

©शिवाजी सांगळे 🦋papillon
संपर्क: +९१ ९५४५९७६५८९ 

सगळे म्हातारे

सगळे म्हातारे

म्हातारे असं कसं करतात?
सकाळीच लवकर उठून बसतात
टाकलाय का हो चहा कुणी?
रँन्डमली उगाच विचारून पाहतात !

न् चहा घेता घेता चवीने 
उगा काहीबाही चौकश्या करतात
अडल्या नडल्या गोष्टींवर
न मागता आपणहून मतही देतात !

फिरता फिरता घरभर 
इतस्ततः पडलेल्या वस्तूंशी बोलतात 
नुसते बोलतच नाहीत
पुन्हा त्यांना,त्यांच्या जागेवर ठेवतात !

नाष्ट्या सोबत, पेपरही उरकतो
न् काही बातम्यांवर लेक्चर ठोकतात
मधेच काहीतरी वाचता वाचता
स्वतःमधे स्वतःच का हरवून बसतात?

आठवण करता सहज कुणी
आपोआप आपणहून भानावर येतात
तसं दूसरं काही काम नसता 
पोथी किंवा मोबाईल घेऊन बसतात !

नातवंडांसह खेळ खेळतानां 
लहान होत त्यांच्याशी भांडणं करतात
दटावता म्हातारीने हळूच कधी
मग लटक्या रागाने रूसूनही बसतात !

गंभीर चर्चेत एखाद्या दुपारी
अनुभवांच्या चार गोष्टी ऐकवतात
पोराबाळांनी मानलं तर ठिक
नाहीतर गपगुमान शांतपणे बसतात !

संध्याकाळी ते मात्र, हमखास
आठवून काही हळवे, कातर होतात
म्हातारीशी सावकाश बोलताना
गुपचुप स्वतःचे डोळे टिपून घेतात !

काहीतरी पुटपुटत स्वतःशी
मनात कसलीतरी उजळणी करतात
अगदीच नाही काही सुचलं
तर पोथी घेऊन हाती एकांती बसतात !

वयोपरत्वे आल्या आजारांची
दागिने आहेत म्हणून टर उडवतात
चालते फिरते असले तरी
कधी कधी जास्त चिडचिड करतात !

रात्रीचं जेवण, गोळ्या, औषध
मात्र न चुकता, आपणहून स्वतः घेतात
उद्या पुन्हा कामं आहेत म्हणता
डोळे मिटून अंथरूणात जागेच राहतात !

नेहमीच प्रश्न पडतो मला
सगळे म्हातारे असं काय करतात?
कदाचित वाढत्या वयाशी
कर्तव्याचा गुणाकार का मांडतात ?

https://marathikavita.co.in/index.php?topic=54446.new#new

©शिवाजी सांगळे 🦋papillon
संपर्क: +९१ ९५४५९७६५८९

जागता जागता

जागता जागता

वाटेत भेटले कुणी अचानक चालता चालता 

घेतल्या आणाभाका मैत्रीच्या बोलता बोलता 

सांगितले गेले गुपित मनीचे,सारे खाजगीतले 

करूनी कित्येक प्रयत्न त्यांस टाळता टाळता 

का रंगली चर्चा दोघात एवढी...काही कळेना 

कोमेजला गजरा मोगऱ्याचा माळता माळता 

बातचीत अन् झडल्या चर्चा,रात्रभर दोघांच्या 

एकट्यात तेवणारा दीपस्तंभ विझता विझता 

किमया अशी काय झाली त्या रात्र मैफलीची 

रेंगाळले गोड स्वप्न, स्वप्नातून जागता जागता 

https://marathikavita.co.in/index.php?topic=54388.new#new

©शिवाजी सांगळे 🦋papillon

संपर्क: +९१ ९५४५९७६५८९

तुटलो असा की

तुटलो असा की

एकदा तुटलो असा की, पुन्हा वळलो नाही 
बदलूनी वागणे बोलणे कुणा कळलो नाही 

सोडली वाट ती, देवून दु:खे जी गेली काही
दाखवली आमिषे कैक तरी पाघळलो नाही 

उगाच पोळले आयुष्याने,या असे वेळोवेळी 
अज्ञाताने कोणा बळ दिले नी जळलो नाही 

पचवता पचवता खेळात डाव छळकपटाचे    
नव्हतो अव्वल तरी, मुद्दाम कोसळलो नाही

लागले वेड जीवनाचे, अविट सोसता वेदना 
मात्र मायेस आभासी, येथल्या चळलो नाही

https://marathikavita.co.in/index.php?topic=54159.new#new

©शिवाजी सांगळे 🦋papillon

संपर्क: +९१ ९५४५९७६५८९

शहरामध्ये

शहरामध्ये

वेदनांना गाव नाही बदलत्या शहरामध्ये 
भावनांना भाव नाही वाढत्या शहरामध्ये 

जो तो व्यस्त येथे, कार्यात कोणत्यातरी
ऐकण्या नाही कुणी बोलत्या शहरामध्ये 

दाखवतो रात्रंदिवस आसमंत एकच रंग  
लख्ख उजेड नभात जागत्या शहरामध्ये

भडकतात ज्वाळा दुरदूर वर ठिणग्यांनी
स्वार्थ साधू अफवांनी पेटत्या शहरामध्ये

पुर्वापार म्हटले गेले "थांबला तो संपला"
खरे उतरते सत्यात, धावत्या शहरामध्ये

https://marathikavita.co.in/index.php?topic=54029.new#new

©शिवाजी सांगळे 🦋papillon
संपर्क: +९१ ९५४५९७६५८९