क्षण गोठले काही

क्षण गोठले काही

ओलसर सांज वारे भोवताली 
गंध रातराणीचा प्यायलेले,
एकाकी व्याकूळ दूर बासरीने
सूर विरही हळूवार छेडलेले !

रात्र अंधारली शोधात मौनाच्या 
तारकांनीही पदन्यास टाकले,
सुगंधित बंध स्मृतींचे आपुल्या
मनी आपसूक कसे हे दाटले !

गोठवून क्षण कोणते साठवावे 
तु मी आपण मिळून जगलेले,
कुजन ते फांदीवरल्या पाखरांचे 
अनाहत श्वासात सूर भिडलेले !

वळणावर त्या किती उसासे
ह्रदयी तुजला साठवून गेले,
एक एक श्वास बेभान होऊन
निशब्द अश्रू मी सोडून आले !

https://marathikavita.co.in/marathi-virah-kavita/t32181/new/#new

© शिवाजी सांगळे 🦋
संपर्क: +९१ ९५४५९७६५८९