हायकू १२४-१२६

#हायकू १२६
सजला मळा
हिरव्या अंकुरांचा
रानात आता २९-०७-२०१७

#हायकू १२५
उन सावली
मधेच ये पाऊस
श्रावण मास २८-०७-२०१७

#हायकू १२४
किरण पडे
चमके दव थेंब
भास बिलोरी २७-०७-२०१७

ढंग आगळे

ढंग आगळे

तुझ्या आठवांचे ऋतू कोवळे
जगतो एकटा क्षणांचे सोहळे

गुंतुनी गुंत्यात मी असा गुंततो
होता नाही आले मला मोकळे

ढग कित्येक झाले होते गोळा
नच बरसले त्यांचे ढंग आगळे

कामी ना येती कुणी कार्याला
करण्या टिका जमतात कावळे

दाखले काय दिले कंपुबाजांनी
झाले आरोपी शिक्षेतून मोकळे

पुजीले जयां ठेवून भाव भोळा
निपजले जोडीने ढवळे पोवळे

गेले कित्येक कोरडे पावसाळे
भासू लागले प्रिय पहा उन्हाळे

© शिवाजी सांगळे 🦋
http://marathikavita.co.in/marathi-kavita-others/t29166/new/#new

विसरून गेली

विसरून गेली

डोळ्यात स्वप्ने कोणती देवून गेली
काळजात माझ्या घर करून गेली

चेतवून शब्द याग मज मनात येथे
लिहिण्याचे असे वेड लावून गेली

स्पंदने ह्रदयाची गातात तीच गीते
सांज किनारी तु जी शिकवून गेली

विस्मरावी मी कशी ती सारी स्वप्ने
पाहिलेली आपण जी सोडून गेली

मोगरा गंधवेडा केसात माळलेला
वहीत माझ्या कसा विसरून गेली

© शिवाजी सांगळे 🦋
http://marathikavita.co.in/marathi-virah-kavita/t29147/new/#new

तुम्ही गणनायक

तुम्ही गणनायक

मंगल मुर्ती तुम्ही गणनायक
लंबोदर तुम्ही वरद विनायक
तुम्हीच एक भक्ताला पावक
वक्रतुंड तुम्ही सिध्दी विनायक ।।धृ।।

मुर्ती तुझी रे आम्ही स्मरावी
स्तुती तुझी न् किती करावी
एकदंता तुझी कृपा रहावी
दु:ख दारिद्रय ते सारे हरवून
व्हावे आमुचे तुम्हीच तारक।।१।।

मंगल मुर्ती तुम्ही गणनायक
लंबोदर तुम्ही वरद विनायक।।धृ।।

विद्या पती तुम्ही कलाधीपती
सेनापती थोर तुम्ही बुद्धीपती
सुखदाता विघ्नहर्ता यशपती
युध्दकला निपुण चतुर योध्दा
अजोड तुम्ही दैत्य संहारक।।२।।

मंगल मुर्ती तुम्ही गणनायक
लंबोदर तुम्ही वरद विनायक।।धृ।।

© शिवाजी सांगळे 🦋
http://marathikavita.co.in/marathi-bhakti-kavita/t29143/new/#new

हायकू १२१-१२३

#हायकू १२३


#हायकू १२२
रात्र झुलवी
ते स्वप्नांचे हिंदोळे
तुझे न् माझे २६-०७-२०१७

#हायकू १२१

प्रथम वंदिता

प्रथम वंदिता

विनवणी तुजला प्रथम वंदिता
तूच गणपती आम्हा विघ्नहर्ता
शरण तुजला आम्ही आलो आता
तूच गणपती आम्हा विघ्नहर्ता।।धृ।।

शक्ती अर्पितो,भक्तीला पावतो
भक्तांच्या हाकेस, धावूनी येतो
तुंदिल तनु तू बुद्धीची देवता।।१।।

विनवणी तुजला प्रथम वंदिता
तूच गणपती आम्हा विघ्नहर्ता।।धृ।।

अनेक रूपात, बाप्पा तूच येतो
भक्त जनांसी, नेहमी दर्शन देतो
लाडका कृपाळु, भक्तांचा त्राता।।२।।

विनवणी तुजला प्रथम वंदिता
तूच गणपती आम्हा विघ्नहर्ता।।धृ।।

© शिवाजी सांगळे 🦋
http://marathikavita.co.in/marathi-bhakti-kavita/t29132/msg68940/#msg68940

हायकू

#हायकू १२०
झाडांच्या पाना
जोजवी वात पान्हा
सारे पहा ना २४-०७-२०१७

#हायकू ११९
तीच्या बटांना
छळतो मुक्त वारा
मला शहारा २४-०७-२०१७

#हायकू ११८
पाउल तिचे
जरासे रेंगाळले
अश्रु झरले २३-०७-२०१७

भिती कुणाची

भिती कुणाची

का वाटते मनाला ऊगा भिती कुणाची
आहे तुझे तुझ्याशी चिंता तुला कुणाची

कोणी कसे लिहावे ज्याची तयास चिंता
ऊगा पिळून जीवा त्वा खंत ती कुणाची

झाले कितेक मोठे होऊन थोर गेले
का ती फुका करावी चिंता इथे कुणाची

आस्वाद लेखनाचा चाखून छान घ्यावा
खोडी उगा कशाला काढायची कुणाची

लोकांस काय त्याचे तूम्ही कसे लिहावे
लावून बोल कोणा का हाय घ्या कुणाची

© शिवाजी सांगळे 🦋
http://marathikavita.co.in/marathi-kavita-others/t29122/new/#new

http://www.maayboli.com/node/63209

हायकू

#हायकू ११७
सांज वाहते
गूढ गर्द सावल्या
भास बाहुल्या २२-०७-२०१७

#हायकू ११६
काळी धरती
पावसाने खुलते
बीज रूजते २१-०७-२०१७

#हायकू ११५
बा रे पावसा
थांब आता जरासा
घेण्या उसासा २१-०७-२०१७

डोळे भरून गेले

डोळे भरून गेले

येथून नेमके का वारे फिरून गेले
सारे कसे निखारे येथे विझून गेले

कष्टात जिंकलेल्या सार्‍याच वैभवाला
डावात खेळतांना का ते हरून गेले?

युद्धात हारले जे जाता समीप जेत्या
उन्माद प्यायलेले हत्या करून गेले

नेत्रात भाव त्याच्या व्याकूळ गोठलेले
कोणास देख कष्टी डोळे भरून गेले

गाथा जरी बुडाली कुंभाड ते रचूनी    
सच्चे अभंग त्यांचे सारे तरून गेले

© शिवाजी सांगळे 🦋
http://marathikavita.co.in/marathi-kavita-others/t29102/new/#new