शिवाजी म्हणतो

गुरुवार, ६ सप्टेंबर, २०१८

उसासे

उसासे

गंधाळली रान माती, पाऊस ढळून गेल्यावर
येतात भरूनी डोळे, पाऊल वळून गेल्यावर

ऐकता पहाट उसासे, काळोखाने सोडलेले
आवळले पाश कवेचे, रात्र ती टळून गेल्यावर

गुणगुणता कानात काल, गुज भुंग्याने हेच केले
दरवळतो गंध फुलांचा, बहर तो गळून गेल्यावर

रात्रीस धरपकड झाली, थोरामोठ्या सज्जनांची
महत्त्व कैदेचे कळले, चोर ते पळून गेल्यावर

पैसा आणि सत्ते मुळे, स्तर नि थर बदलून गेले
मुरारी राजकीय नवे, धर्मास छळून गेल्यावर

© शिवाजी सांगळे 🎭
संपर्क:९५४५९७६५८९
http://marathikavita.co.in/marathi-song-lyrics/t31256/new/#new

शुक्रवार, ३१ ऑगस्ट, २०१८

मिजास

मिजास

बदलाची आस असावी
जगण्याची प्यास असावी..!

डोक्यावरती जड ओझे
भाळी आरास असावी..!

वागो कोणी मग काही
सत्याची कास असावी..!

मैत्रीणी लाख जरी, ती
एखादी खास असावी..!

निवडुंगा फूल फुलेतो
काट्यांस मिजास असावी..!

© शिवाजी सांगळे 🎭
संपर्क:९५४५९७६५८९
http://marathikavita.co.in/marathi-song-lyrics/t31238/new/#new

बुधवार, २९ ऑगस्ट, २०१८

श्रावण सजला

श्रावण सजला 🌾🌿

खूप सुंदर श्रावण सजला
कवितेमधे अलगद मुरला

ओलसर त्या पहाट वेळी
प्राजक्तही मनी लाजला

सावरताच धवल सर्वांगा
केशरासह तो लडखडला

केवड्याने कात सोडता
काट्यांसही दरवळ फुटला

मोगरा निपचित या प्रहरी
मिटूनी कळी शांत निजला

भिजून येता दवात शब्द
पानांवर सुगंध सांडला

रानांत बहर फुलांत बहर
बहर मना मनात बहरला

व्रतवैकल्ये मनी ठसवुनी
श्रावण हा पुन्हा प्रकटला

खूप सुंदर श्रावण सजला
कवितेमधे अलगद मुरला

© शिवाजी सांगळे 🎭
संपर्क:९५४५९७६५८९
http://marathikavita.co.in/marathi-kavita-others/t31229/new/#new