शिवाजी म्हणतो

गुरुवार, ३ जानेवारी, २०१९

अधीर

अधीर

पाखरेही सांज वेळी

अशी आतुरली सारी

शुभ्र नभां सांगाती

निघालीत ती माघारी

क्षितिजतळी भास्कर

साजरा पितांबर नेसला

गाण्यास निरोप गाणी

एक तरुही सरसावला

सोहळा रम्य सृष्टीचा

असा हा रोजच रंगतो

मिसळण्या चांद रात्रीत

दिवस सारा अधीरतो

©शिवाजी सांगळे 🎭

मो.९५४५९७६५८९

http://marathikavita.co.in/marathi-kavita-others/t31472/new/#new

छायाचित्र सौजन्य: श्री प्रकाश नेवासकर

मंगळवार, १ जानेवारी, २०१९

नवं नवं...

नव्याचं काहुर नवं
जर पाहिलंच नीट तर
काय असतं नवं?
तुम्ही, आणि मीच असतो,
कुटुंबही आपलं तेचं असतं...

घर, शेजार अन् परिसर
मित्र मंडळी, स्नेही,
मैत्री आणि दुष्मनी
जगवणारं नातं तेच असतं...

चहा पण नाही बदलत
नव वर्षाच्या सकाळचा!
असूनही कुटुंबाची अपेक्षा...
खरंच विचारा मनाला
करतो आपण पुर्ण अपेक्षा?

विचारा न् स्वभावातल्या
वाईटात बदल व्हायला हवा
अहंकार, गर्व, अभिमान
बाजूला जायला नको का हवा?

असं काही झालं तर..!
ठरेल खरं नव्याचं नवेपण,
करुया का विचार असा
मिळून तुम्ही, मी...आपण?

© शिवाजी सांगळे 🎭
मो. ९५४५९७६५८९
http://marathikavita.co.in/preranadai-kavita/t31470/new/#new

सोमवार, ३१ डिसेंबर, २०१८

रक्तिमा

छायाचित्र सौजन्य: श्री प्रकाश नेवासकर

वहिवाट

वहिवाट

वाट्यास आलेला । क्षण रम्य व्हावा ।
जन्म तो सरावा । सेवेसाठी ।।

सामोरी जो येता । क्षण ते मोहाचे ।
भान हो जनाचे । मनी राहो ।।

विसरूनी सेवा । जनहिता वेळी ।
आपुलीच पोळी । भाजू नये ।।

अवलंबू नये । स्वार्थ लोभ नीती ।
विस्कटून नाती । इहलोकी ।।

काळाचीच रीत । व्यवहारी भ्रष्ट ।
अंती करी नष्ट । ध्यानी असो ।।

कोण नित्य येथे । थांबावया आले ।
जाणे ठरलेले । माघारीचे ।।

ऐसी वहिवाट । आहे या युगाची ।
हाक वास्तवाची । ऐक शिवा ।।

© शिवाजी सांगळे 🎭
मो. ९५४५९७६५८९

http://marathikavita.co.in/marathi-bhakti-kavita/t31465/new/#new