मराठी-हिंदी कविता, गझल, हायकू, त्रिवेणी, चारोळ्या, वात्रटिका, लेख व आणखी खुप काही, भावना मनातून शब्दात उतरलेल्या व रसिकांना अर्पण केलेल्या
रविवार, १२ नोव्हेंबर, २०२३
मंगळवार, १० ऑक्टोबर, २०२३
माणूस
माणूस
शोधतोय अजूनही मला कळलेला माणूस
गर्दीत नाही भोवती, हवा नसलेला माणूस
थोडेफार काही जरा साध्य केले इथे कुणी
वागतो,जणू परग्रहावरून आलेला माणूस
फसगत होते जाणण्यात माणसास तरीही
सर्वात वेगळा दिसतो कष्ट केलेला माणूस
"शिक्षण म्हणजे वाघीणीचे दूध" सत्य खरे
म्हणूनच सगळ्यात श्रेष्ठ शिकलेला माणूस
वर वर जरी, चढविलेत पोशाख कोणतेही
प्रसंगी कळतो खरा त्यात दडलेला माणूस
वाढते आहे आयुष्य आपल्या गतीने, मात्र
शोधतोय अजून मी हवा असलेला माणूस
ईतर कविता, October 10, 2023, 02:40:07 PM (14:40 YQ)
©शिवाजी सांगळे 🦋papillon
संपर्क: +९१ ९५४५९७६५८९
शनिवार, ७ ऑक्टोबर, २०२३
प्रचार जोर
प्रचार जोर
शक्तीप्रदर्शनाचा जोर आताशा
खरोखरच बेफामपणे वाढत आहे?
जे.सी.बी., डंपर देखील हल्ली
राजरोसपणे प्रचारात वापरत आहे!
शेतकऱ्यांना भाव नसतांना
वजनदार हारांनी काय सिध्द होते?
आपलं म्हटलं, म्हणून खरं का
आपलं सरकार, आपलं केव्हा होते?
वात्रटिका, October 07, 2023, 07:41:03 PM (YQ)
©शिवाजी सांगळे 🦋papillon
संपर्क: +९१ ९५४५९७६५८९
रविवार, १ ऑक्टोबर, २०२३
हाताची घडी ०११०२०२३ YQ ११:१०
हाताची घडी
अपयशाच्या डोंगरात...अपेक्षांची होडी
चाचपडणाऱ्या जगण्याची वेगळी गोडी
अंधूक प्रकाश कधी लख्ख काळोखात
चढ उतार नित्याचा त्यास सोवळी शिडी
लक्षवेधी अशी, सारीच का येथली चित्रे
नेहमीच लावतात, आभासी लाडीगोडी
सगळ्यांनाच एक सुखदुःखाचा किनारा
ऐपतीप्रमाणे घेतो, प्रत्येकजण येथे उडी
सारेच का ठरलेले? नियतीचे सर्व फासे
म्हणून का जगावे घालून हाताची घडी?
©शिवाजी सांगळे 🦋papillon
संपर्क: +९१ ९५४५९७६५८९
शनिवार, ३० सप्टेंबर, २०२३
भावना निनांद ३००९२०२३ YQ १३:०९
भावना निनांद
अनभिज्ञ असता कुणी परस्पर
ओढ शब्दांची जोडते शब्दांना
तरंग प्रवाहात भावभावनांच्या
चढतेच रंगत खरोखर शब्दांना
शब्दांनीच सहजच जुळते नाते
शब्दांनीच आयुष्य खुलत जाते
मोहमायेत या जगात आभासी
अन्यथा कोण कुणाशी बोलते?
साधेच असते देणे घेणे शब्दांचे
अव्याहत नियम साद प्रतिसाद
जुळता नाळ कधी आपसूक ती
मनात गुंजे नित्य भावनानिनांद
©शिवाजी सांगळे 🦋papillon
संपर्क: +९१ ९५४५९७६५८९
शुक्रवार, २२ सप्टेंबर, २०२३
मंगळवार, १९ सप्टेंबर, २०२३
सत्य शोध
सत्य शोध
ठरवून परस्पर घरदार जन्म येथे घेतो का कोणी
कोण आपले, गैर कोण मुळी जाणतो का कोणी
कुणी जोडले नाते किनाऱ्याचे असे येथे लाटांशी
काय म्हणणे सागराचे त्यास विचारतो का कोणी
सारेच अंदाज आमचे येथले दरवळांवर बेतलेले
खाद्य स्वादा पलीकडले, दूजे चाखतो का कोणी
पुरेल कुठवर थिगळ रफु विरल्या वस्त्र नात्यांना
येते ढीलाई सुतास कातल्या आठवतो का कोणी
खरे खोटे, निती अनितीच्या, झाडतो स्वैर गप्पा
विधिनिषेध तयांचे वास्तवात पाळतो का कोणी
अल्प होते मिलन तिमिर प्रकाशाचे फक्त दोनदा
शोध सत्य 'शिव' जन्ममृत्यूचे जाणतो का कोणी
https://marathikavita.co.in/gambhir-kavita/t44623/new/#new
©शिवाजी सांगळे 🦋papillon
संपर्क: +९१ ९५४५९७६५८९
शनिवार, १६ सप्टेंबर, २०२३
रुप तुझे
रुप तुझे
तुला ना मोह झाला तु तुझ्याच रुपात
तोही साऱ्या अशा बदलांच्या परीघात
वेळ तर बदलली, काळ ही बदलतोय
करून मात साऱ्यांवरती तु दिमाखात
मोहक क्षणभर, येतील कैक मायावी
तु साजरी गोजरी खरी तुझ्या कैफात
भले कळे ना कुणा लावण्याची भाषा
डोलता पदर तुझा जणू तरंग तळ्यात
सोज्ज्वळ, मादक, कधी भिन्न रुपात
खुलते रुप ललनेचे, खरोखर साडीत
https://marathikavita.co.in/marathi-shrungarik-kavita/t44512/new/#new
©शिवाजी सांगळे 🦋papillon
संपर्क: +९१ ९५४५९७६५८९
शुक्रवार, १५ सप्टेंबर, २०२३
बुधवार, १३ सप्टेंबर, २०२३
याची सदस्यत्व घ्या:
पोस्ट (Atom)